Dodge аса қуатты батареялы маслкар жасамайтын болды

Dodge 2024 жылы таныстырған электрлі Charger Daytona-ның комплектациясын қыстартып жатыр. Әу баста купе мен седанның аса қуатты екі моторлы түрленімі жарық көреді деген жоспар болған. Бірақ Mopar Insiders марка шешімінен бас тартты деп жазды.

Портал бұл ақпаратты компонент жеткізушілерден білген. Dodge серіктестеріне Banshee-ге компонент қажет емес екенін хабарлапты. Жоспар бойынша мұндай Charger-дің 800 және 900 ат күшіне ие екі комплектация болуға тиіс еді.

Басылым марка флагманнан қаржы үнемдеу үшін бас тартты деп болжады. Өйткені қазір батареялы Charger-ге сұраныс аз, ал аса қуатты машинаның бағасы 100 мың доллардан асып кететіні анық. Компания басылымға берген жауабында портфолиосын нарық талабы мен клиент сұранысына сай реттеп жатқанын айтыпты.

Бұған дейін Dodge басшылары 496 ат күшіне ие базалық Charger Daytona-дан уақытша бас тартқан. Қазір электрокардың Scat Pack атауын алған 670 ат күшіне ие жалғыз модификациясы сатылып жатыр. Charger-дің бензинді алты цилиндрлі Hurricane турбомоторымен жүретін түрі де бар. Осыған қарап марка жанкүйерлері компания қуатты V8 көмегімен қозғалатын Charger Hellcat-ты қайта конвейерге қояды деп сеніп отыр.