Дизель дауына тап болған Mercedes-Benz шығынға батты

Mercedes-Benz шамамен 150 млн доллар айыппұл және өтемақы төлейді. Reuters хабарлағандай, бұл талап өндіруші мен АҚШ прокурорлары коалициясы арасындағы келісімде жазылған. Шенділер компанияға дизельді мотордан шығатын зиян газ мөлшерін әдейі төмен көрсетіп, реттеуші орган мен клиенттерді алдады деп айып тақты. Mercedes-Benz айыппұл төлеумен қатар ақауы бар автомобильдерді жөндеуге міндетті болады.

АҚШ билігі 2008–2017 жылдары Mercedes-Benz елде заңсыз басқару жабдығы бар дизельді мотормен жүретін 211 мыңнан аса автомобиль сатқанын хабарлады. Сертификат сынағынан өткен кезде қозғалтқыштан шығатын зиян газ мөлшері нормаға сай болғанымен, машина жолға шыққанда бұл көрсеткіш рұқсат етілген деңгейден 30–40 есе асып түседі. Компания көліктерін экологияға еш зияны жоқ деп жарнамалаған, билік мұны халықты алдау деп бағалап отыр.

Reuters хабарлағандай, ақауы бар «мерседестер» тізіміне E және S класты седандар, сондай-ақ GL, GLE, GLK, ML модельдері кіреді. Заңсыз бағдарламалық жасақтама дизельді Sprinter-лерде де кездеседі.

150 млн доллардың 120 миллионы штаттарға бөлінеді, жергілікті билік қаржыны атмосфераны қалпына келтіруге жұмсайды. Қалған бөлігі — айыппұл. Компания дер кезінде сервистік кампания жариялап, талапқа сай келмейтін қозғалтқыштарды экологиялық нормаға сай жөндесе, айыппұл сомасы азаюы мүмкін. Ол үшін билік Mercedes-Benz-ке 2026 жылдың күзіне дейін уақыт берді.