Dacia Sandero Еуропадағы ең көп сатылатын көлік атанды

Румын-француз субкомпакт 2020-2021 жылдары буын алмастырды және сол кезден бастап Еуроодақ нарығында Dacia Sandero-ға сұраныс артып отырды. Көлік қауіпсіздік рейтингінде бар болғаны екі жұлдыз жинаса да, бренд имиджі мен жаңа модельдің қолжетімді бағасы (Францияда шамамен 12 мың еуродан басталады) оң әсер етті.

Былтыр Sandero сауда жағынан тек Tesla Model Y-ке жол берді. Биыл америкалық электромобильдің алғашқы үштікке енуі екіталай (бірінші жартыжылдықта 8 орында), ал 164 780 данасы сатылған Sandero үстемдік етіп тұр, бұл 2023 жылдың осы кезеңімен салыстырғанда 18.5 % жоғары.

Еуропада қаңтар мен маусым аралығындағы Sandero-ға сұраныс Volkswagen Golf (125 993 дана) және Renault Clio (114 623 дана) сияқты өткен жылдардың үздіктерін озып кетті деп мәлімдеді AutoExpress. Sandero-ның Dacia Spring деп аталатын электрлі нұсқасы қазір Еуропадағы ең арзан электромобильдің бірі болып саналады, бастапқы бағасы 17 300 еуро, ал Румынияда субсидиялардың арқасында бар болғаны 10 990 еуродан басталады.

Халықтың едәуір төмен табысына қарамастан, тұтынушылар Hyundai Tucson және Kia Sorento сияқты жоғары сегменттегі машиналарды жөн көреді, ал бюджеттік категорияда ескірген Chevrolet Cobalt седаны басым.