Қытайлық SAIC пен General Motors-тың Қытайдағы бірлескен жобасы қысқарып, үш брендтің біреуі қатардан шығуы мүмкін. CarNewsChina хабарлағандай, альянс күрделі стратегиялық шешім қабылдап, елдегі Chevrolet өндірісін тоқтатуы мүмкін.
Қытайдағы «Шеви» саудасы құлдырағалы көп болды. 2018 жылы марка елде 640 000 автомобиль саудаласа, 2023 жылы бұл көрсеткіш 168 588 данаға кеміген, былтыр 52 774 машина сатты. Ал 2025 жылдың алғашқы төрт айында небәрі 5314 көлік иесін тапқан. Бұл 2024 жылғы сәйкес кезеңмен салыстырғанда 75.9 % төмен нәтиже.
Chevrolet Monza
Биылғы сауданың 80 %-ы арзан және жасы келген Monza-ға тиесілі. Болашақта қарқынды дамып келе жатқан Қытайда бұл модельге қызығушылық мүлде жоғалуы мүмкін. Бұл көлік Қазақстан мен көршілес Өзбекстанда танымал, оны жеке кәсіпкерлер әкеліп жатыр, өйткені ол ТМД елдерінде ресми түрде сатылмайды.
Қытайлық Zaker басылымы инсайдерлеріне сілтеме жасап хабарлағандай, автоөндіруші Қытайда D2UC-2 ICE (Trailblazer), C223 (электрлі кроссовер) және C1YC-2 (флагмандық SUV) индексті модельдік топтаманың жұмысын тоқтатқан.
SAIC-GM басшылары Chevrolet Қытай нарығынан кетеді деген ақпаратты жоққа шығарып, брендтен бас тартпайтынын хабарлады. Бірақ 36kr порталы топ-менеджер сөзінің соңғы бөлігі дұрыс аударылмаған деп санайды, компания өкілі Chevrolet иелерінен бас тартпайтынын, оларға қызмет көрсету жалғасатынын айтқан.
Комментариев: 0