Camaro электрлі кроссовер болуы мүмкін

Chevrolet 2023 жылы конвейерден алып тастаған Camaro әлі жанкүйерлерінің көңілінен кетер емес. MotorTrend оған қатысты қызық мәлімет берді.

Бренд Camaro атауын жаңа батареялы жол талғамайтын көлікке бергелі жатыр-мыс, Ultium платформасына негізделетін машинаны өндіру процесін жеңіл әрі жылдам ету үшін General Motors концернінің басқа өнімдеріндегі тораптар мен агрегаттар қолданылады екен.

Атап айтқанда, марка оған Blazer E-нің 85-102 кВт⋅сағ батареясын орнатады. 365-615 ат күші мен 370-880 Нм момент беретін күштік құрылымды да содан алады.

Camaro кроссовері келер жылы шығып қалуы ықтимал деп жазды басылым. Стандарт нұсқасынан бөлек GMC Hummer EV-ге тиесілі 1160 ат күшіне ие үш моторлы күштік құрылыммен жабдықталатын ZL1 атты экстремал түрленімі жарық көретін сияқты.

Компанияның маслкардан бас тартуына сауда көлемінің кемуі себеп болды. 2016 жылы дилерлер небәрі 72 705 көлік сатса, 2023 жылы 24 688 машинаның кілтін тапсырды. Ал әйгілі модельдің дәурені жүріп тұрған 1979 жылы 282 571 автомобиль өткен.