BYD жаңа автопилот жасады

Компания God’s Eye деп аталатын жаңа интеллектуалды көмекші жүйесін таныстырды. Кешен бағасы 10 мың доллардан аспайтын Seagull сияқты арзан модельдерге де орнатылады деп хабарлады CarNewsChina.

BYD, Denza, Fang Cheng Bao және YangWang көліктері бірдей жүйемен жабдықталмайды. Үш түрі қолжетімді болады.

Базалық God’s Eye C модификациясы 12 камерадан (3 алдыңғы, 5 панорамалық, 4 айнала шолу) және 17 радарлы сезгектен тұрады. Бұл жүйе BYD брендінің көліктеріне қойылады.

God’s Eye B нұсқасы қосымша лидармен жабдықталған және BYD флагмандары мен Denza және Fang Cheng Bao модельдеріне арналған.

Үш лидары бар үздік God’s Eye A автопилоты YangWang машиналарына және кедергіден секіріп өте алатын U9 суперкарына орнатылады.

God’s Eye C автомобильді жолақта ұстайтын бейімді круиз-бақылау сияқты жұмыс істейді, ал B және A нұсқаларының функциясы кеңейген, оны қаланың ішінде қосуға болады.

God’s Eye кешенінің барлық нұсқасы DeepSeek нейрожелісіне қосылған, онымен жұмыс істеу алгоритмі одан әрі жақсарады.