BYD суперкардай жылдам седан шығарады

Қытай өнеркәсіп министрлігі жаңа BYD Han L моделінің сипаттамасын жария етті. Ол қазіргі Han-ның орнын басуы мүмкін және электромотор қуаты бойынша Қытайдағы электромобильдер арасында көшбасшы болмақшы. Жергілікті БАҚ хабарлағандай, ең қуатты Han L алғашқы жүздікті 2.7 секундта еңсереді.

Базалық BYD Han L 680 ат күшін беретін бір электромотормен жабдықталған. Әдетте Кытай автоөндірушілері сериялық автомобильге мұндай қуатты мотор орнатпайды. Дегенмен толық жетекті седан одан да ерекше қозғалтқыш алады. 789 ат күшіне ие агрегат артқы дөңгелектерді айналдырады, ал 313 ат күші бар қозғалтқыш алдына орнатылған.

Бір моторлы Han L 240 км/сағ жылдамдықпен жүрсе, толық жетекті нұсқаның көрсеткіші — 270 км/сағ. Екі түрленім BYD-дің литий-темір-фосфатты батареясымен жабдықталады. Компания Han L үшін моторды да өзі әзірлейді.

Модельдің гибрид модификациясы туралы да ақпарат бар. Олар артқы және толық жетекті болады. Біріншісі 272 ат күшіне ие электромотормен жүреді, екіншісі 544 ат күші бар күштік құрылым алады. Екеуіне де 156 ат күшін беретін 1.5 литрлік іштен жанатын қозғалтқыш орнатылады. Электрлі режимде седандар 145-170 шақырым жүре алады, ал ең қуатты көлік алғашқы жүздікті 3.5 секундта еңсереді.

BYD концерні бұған дейін Han L және Tang L кроссоверінің ресми тизерлерін жариялаған еді. Ол да осындай күштік құрылыммен жабдықталатын сияқты, бірақ Tang L-дің салмағы 3 тоннаға жуық болғандықтан, динамика бойынша артта қалады.