BYD Sealion 06 Қытайда гибрид және электрокар түрінде шықты

BYD концерні Қытайда Ocean топтамасына кіретін жаңа Sealion 06 моделін таныстырды. Ол толыққанды электромобиль немесе жүріс қоры 1670 шақырымға жететін қуатталатын гибрид ретінде сатылады. Бес нұсқаның біреуі ғана толық жетекті. Бағасы — 139 800-163 800 юань (10.6–12.4 млн теңге) аралығында.

Өлшемдері — 4810×1920×1675 мм, дөңгелек базасы — 2820 мм. Ол Sealion 05-тен ұзын. Дискілері — 19 дюйм. Жүксалғыш көлемі — 1630 литр. Электромобильдің алдында қосымша 142 литрлік жүксалғыш бар. BYD Sealion 06 толықтай тәуелсіз аспа және бейімді амортизаторлар алған.

06 DM-i деп аталатын гибрид 101 ат күшіне ие 1.5 литрлік бензинді қозғалтқышпен және 218 ат күшін беретін электромотормен жүреді. Батарея сыйымдылығы — 18.3 немесе 26.6 кВт·сағ. Қуатты нұсқасы алғашқы жүздікті 7.5 немесе 7.8 секундта еңсереді. Электр қуатымен жүріс қоры 93 немесе 130 км-ге жетеді. Жалпы жүріс қоры 1621–1670 шақырым шамасында.

Компания заманауи e-Platform 3.0 Evo платформасына негізделген электрокарды үш түрлі конфигурацияда ұсынады. Артқы жетекті машиналар 231 немесе 245 ат күшіне ие электромотормен және 65.28 немесе 78.72 кВт·сағ батареямен жабдықталады. Олар 520 немесе 601 км жүріп өтеді. Толық жетекті көліктің артына 245, алдына 150 ат күші бар мотор орнатылады. Бұл модификация 550 км жүре алады. Бір моторлы кроссовер жүзге дейін жылдамдықты 7.5 секундта алады, ал толық жетекті Sealion 06 EV туралы ақпарат әлі жарияланбаған.

Жаңа өнімнің стандарт жабдықтар тізімінде алдыңғы орындықтарды жылытқыш және желдеткіш, 15.6 дюймдік экран орнатылған мультимедиа жүйесі, панорамалы шатыр, Dynaudio акустикасы, төрт бөтелке сыятын шағын тоңазытқыш, God’s Eye деп аталатын жүргізуші ассистенттерінің кешені бар.

Sealion — BYD-дің сұраныс жоғары топтамасының бірі. Маусымда Қытайда 35 мыңға жуық Sealion электрокары мен гибриді өз иесін тапты, бұл концерннің жалпы айлық саудасының 9 %-дан астамын құрады.