BYD миллионнан аса Seagull сатты

Қытай бренді миллион Seagull өткізуге 2 жыл және 2 ай жұмсады деп жазды Carnewschina.com. 2023 жылы сәуірде шыққан батареялы хетчбэк өз отанында жақсы сатылып, жалпы рейтингте үшінші орыннан көрінді, енді басқа елдерде саудасы қызып жатыр.

Атап айтқанда, конвейерден түскен 60 131 көліктің 31 105-і Қытайда қалса, 29 026 машина шекара асқан. Еуропада бұл модель Dolphin Surf атауымен танымал.

Аспан асты елінде электрокардың бағасы 63 800 юаньнан басталып, 82 800-ге (7540–9800 еуро) дейін барады. Қарт құрлықта кәдімгідей қымбат, ең арзан Dolphin Surf 22 990 еуро тұрады. Бұған салық мөлшерінің артуы ғана себеп болған жоқ, марка бұл жаққа көліктің ұзынырақ (210 мм) нұсқасын жеткізеді.