BYD кей-карын Japan Mobility Show көрмесінде көрсетеді

BYD Жапониядағы автоөндірушілермен бәсекелесуге дайындалып жатыр. Қазанның аяғында өтетін Japan Mobility Show көрмесінде кей-кар класына жататын жаңа электромобиль жарық көреді. Бұл компанияның осы кластағы алғашқы моделі болмақ. Көліктің суреті де тарады.

Марка кей-карын осындай көліктерге тән қырлы пішінде және микровэн стилінде жасаған. Автомобиль Қытай өнімдеріне тән оптика, ірі тұтқасы бар жылжымалы есік және «қалқыма шатыр» әсерін беретін артқы тірекпен ерекшеленеді. Соңғысы Suzuki кей-карларын еске салады.

Ресми деректер әзірге жарияланған жоқ. Дегенмен BYD микровэні Қытайда сынақ кезінде фототыңшылардың назарына ілікті. Фотодан алдыңғы тіректегі әйнек ендірмені және қысқарған шанағын көруге болады. Мамандар осындай шанақ өлшеміне электромотор орнату арқылы қол жеткізген. Компания ұлғайған дөңгелек базасы оны бәсекелестерінен ерек етеді дейді.

Интерьер суретінде алдыңғы орындықтардың орнына бүтін диван, цифрлық аспаптар панелі және жеке медиажүйе экраны бейнеленген. Сырт келбеті жапон стилінде болса, Қытай дизайнерлері салонын өз талғамына сай жобалаған секілді.

Микровэн 20 киловатттық Blade батареясымен жабдықталады, ол WLTC циклі бойынша 180 км жүріп өтеді. Әзірлеушілер бұл Жапониядағы жүргізушілердің күнделікті қолдануына толық жетеді деді. Ерекше машина Қытайда сатыла ма, әзірге белгісіз.