BYD гиперкары Нюрбургрингте рекорд орнатты

BYD концерні батареялы U9 Xtreme гиперкары ресми түрде әлемдегі ең жылдам көліктердің қатарына енгенін хабарлады. Купе Нюрбургрингтің Солтүстік айналма жолын 6 минут 59.157 секундта айналып өтті. Yangwang U9 жер жүзіндегі ең жылдам сериялық электромобиль атанып, Xiaomi SU7-ні артта қалдырды.

Yangwang купесі Xiaomi седанынан шамамен алты секунд жылдам болды. Гиперкарды Нордшляйфе трассасында үлкен тәжірибесі бар неміс шабандозы Морис Кранц тізгіндеді.

Yangwang U9 Xtreme (U9X) төрт электромотормен жабдықталған, әрқайсысы минутына 30 000 айналым жасай алады. Жалпы қуаты 3019 ат күшіне тең. Ресми мәлімет бойынша BYD U9X алғашқы жүздікті 2.36 секундта еңсереді, дрэг-стрип (ширек миль) көрсеткіші — 9.78 секунд. Жүріс қоры — 450 шақырым.

Купе ресми түрде сериялық көлік болғанмен Xiaomi SU7 Ultra сияқты жаппай өндіріске шықпайды, гиперкардың тек 30 данасы жарық көреді. Электромобильдің бағасы — 1.8 млн юань (136 млн теңге).

Қыркүйекте бренд U9 Xtreme-ді ең жылдам сериялық көлік деп атауға болады деп мәлімдеді, себебі Папенбург автодромында электрокардың жылдамдығы 496.22 км/сағ-қа жетті. Инженерлердің есебінше U9X бұдан да жылдам қозғала алады, теориялық тұрғыда купе 500 км/сағ межесін бағындыруға қауқарлы.