BYD Еуропада Tesla-дан көп көлік сатты

BYD концернінің Еуропада саудасы қызып, алғаш рет Tesla-ны артта қалдырды. Reuters бұл туралы JATO Dynamics-тің деректеріне сілтеме жасап хабарлады. Бұл — сәуірдегі көрсеткіш. Бұған дейін көш бастап келген Tesla-ның жағдайы одан әрі нашарлауы мүмкін.

ЕО елдерінде көктемнің екінші айында Tesla 7165 электрокар сатқан, ал BYD 7231 көлікті иесіне табыстаған. Айырмашылық әзірге аз болғанымен сарапшылар оны айтулы сәт деді. Себебі Tesla Еуропада жылдар бойы көш бастап келген, ал BYD тек соңғы уақытта белсенді жұмыс істеп жатыр.

Агенттік қарт құрлықта электрокар нарығы сәуірде жалпы алғанда 28 % өсті, оған негізінен Қытайдың автоөндірушілері себеп болды деп жазды. Кедендік салық артқанына қарамастан, олардың саудасы 59 % ұлғайған. BYD-дің көрсеткіші 169 %, Xpeng-тікі 268 % өскен.

Илон Масктың саясатқа араласуы көп адамға ұнамай қалып, Tesla алатындар азайды. Мысалы, Германияда биыл бірінші тоқсан қорытындысы бойынша Tesla саудасы 62 % төмендеген.

Бұл жағдайға Tesla-ның жаңарған Model Y-ды шығару үшін өндірісті тоқтатқаны және тұтынушылардың болжамы да әсер етті. Кейбіреулер Model Y-дың арзан немесе флагмандық Performance нұсқасы шығады деп үміттеніп, сатып алмай отыр.