BMW Қытайдың Momenta IT-жобасымен серіктес атанды. Компания Қытай нарығына арналған жаңа BMW өнімдеріне электронды көмекшілер жиынтығын әзірлейді. Жергілікті БАҚ хабарлағандай, жүйе алғаш рет 2026 жылы саудаға шығатын Neue Klasse топтамасының электрокарларына орнатылады.
BMW-ге өз өнімдерін жергілікті нарықтың нақты жағдайына бейімдеу үшін қытайлық серіктес қажет болды. BMW үшін Қытай маңызды стратегиялық нарық саналады, сондықтан компания жергілікті тәжірибені ескеріп, озық ұлттық технологияны пайдалануды жоспарлап отыр. BMW-ге арналған Momenta жүйесі жасанды интеллект элементтерімен жұмыс істейді.
Автопилот электрлі BMW жүргізушісіне барлық жағдайда көмектеседі: тұраққа қойғанда, қала көшелерінде және автомагистралда жүргенде. Сондай-ақ Momenta өнімін жаңа электрокарлардың концепциясына біріктіру жоспарланып отыр, олар BMW-ның жүріс философиясын бұзбайды.
Neue Klasse топтамасы Еуропада i3 седаны мен iX3 кроссоверінен тұрады, ал Қытайда топтама үшінші модельмен толығады. Жергілікті нарық үшін дөңгелек базасы ұзын кроссовер жарық көреді.
Momenta компаниясы бұған дейін Mercedes-Benz, Nissan, Toyota сияқты шетелдік өндірушілермен серіктес атанған. Бірақ жоба нарықты монополиялай алған жоқ, мысалы, Audi Huawei-мен жұмыс істеп жатыр.