Биыл қай жолдар ақылы болады

Қазір Қазақстанда жалпы ұзындығы 4.9 мың км болатын 26 ақылы трасса бар. Бүгін үкімет отырысында «ҚазАвтоЖол» ҰК" АҚ басқарма төрағасы Дархан Иманашев 2026 жылдан бастап мына жолдар ақылы режимге көшетінін хабарлады:

• Қарағанды — Балқаш — Бурылбайтал, 554.6 км;
• Бурылбайтал — Күрті, 226.4 км;
• Ақтөбе — Қандыағаш — Мақат, 89 км;
• Талдықорған — Өскемен, 773 км;
• Атырау — Астрахань, 277 км;
• Меркі — Шу — Бурылбайтал, 78 км.

Ведомство басшысы елде ақау шыққан бөлікпен тегін жүруге рұқсат беретін норма күшіне енді деді. Арнайы комиссия Абай, Ақмола, Ақтөбе, Алматы, Жетісу, Батыс Қазақстан, Қарағанды, Қостанай, Қызылорда, Павлодар, Солтүстік Қазақстан және Түркістан облыстарындағы ақылы жолдардан 1 млн 100 мың шаршы метр шұңқыр мен басқа ақау тапқан. Ақау салдарынан бюджетке түсетін қаражат қаншалықты қысқарғаны белгісіз. Мердігерлер бұл бөліктерді жол-құрылыс маусымы басталғанда, яғни көктем келіп, күн жылыған кезде жөндейді.

Дархан Иманашевтың айтуынша былтыр ақылы жолдарды пайдаланған жүргізушілерден 87 млрд теңге түскен. Бұл 2024 жылмен салыстырғанда екі есе көп. Биыл «ҚазАвтоЖол» бұл көрсеткішті 100 млрд теңгеге жеткізуді жоспарлап отыр.

«Жиналған қаражат толықтай трассаны күтіп-ұстауға кетті. Түскен табыстың арқасында 1456 арнайы техника мен жабдық сатып алдық, 354 мың шаршы метр жолды жөндедік және 340 мың текше метр мұзға қарсы материал пайдаландық», — деді ұлттық компания басшысы.