2020 жылы күзде ҚР ИИДМ «Азия Автоны» келісімшарт бойынша міндетін орындамады деп айыптады. Министрлік сот арқылы компаниядан мемлекетке келген 174 млрд теңге шығынды өтеуді талап етті. Нәтижесінде компания билігі биылғы 9 наурызда елдің 19 қаласындағы 4000 қызметкерін жұмыстан басататын болды. Олардың 1969-ы Шығыс Қазақстанда еңбек етеді, 64 адам зейнет жасында.
ШҚО әкімі Даниал Ахметовтың Instagram парақшасында жазылғандай, қазір автоөндірушінің шоты бұғаттаулы, ондағы ақша тек коммуналды қызмет ақысын төлеу, міндетті төлемдер жасау және қызметкерлердің айлығын беру үшін ғана қолданылады. Еңбек етуге қабілетті жастағы азаматтарды әкімдік жұмысқа орналастырады. Шендінің айтуынша, мәселені шешу үшін шұғыл штаб құрылды.
«Одан бөлек бүгін көлік құрастырумен айналысатын отандық зауыттардың басшыларымен келіссөз жүргіздім. Олар мамандарды жұмысқа алуға дайын», — деді Д. Ахметов.
Айта кетерлігі, «Азия Автоның» бұрынғы 20 қызметкері Алматыдағы Hyundai Trans Kazakhstan-ға жұмысқа тұрды, тағы бірнеше маман Қостанайда еңбек етеді.
Комментариев: 0