Билік жүргізушілердің төленбеген айыппұлын кешіреді

Әкімшілік амнистия туралы Қасым-Жомарт Тоқаев жаңа Конституцияның қабылдануына арналған салтанатты іс-шара кезінде мәлімдеді.

«Өздеріңізге мәлім, былтыр қылмыстық жауапкершілікке тартылғандарға рақымшылық жасалды. Енді азаматтар мен мемлекеттің қауіпсіздігіне қатер төндірмейтін бірқатар қылмыстық және әкімшілік құқық бұзушылық бойынша тағы рақымшылық жариялауға болады. Елімізде әкімшілік істер бойынша рақымшылық алғаш рет жасалатынын атап өткім келеді. Парламент қазіргі сессияның соңына дейін тиісті заң қабылдауы керек. Бұл — негізгі заңдағы адамгершілік идеалдары мен прогрессивті құндылықтарды қоғамда орнықтыратын маңызды қадам», — деді мемлекет басшысы.

Бүгін Үкімет отырысында ішкі істер министрі Ержан Сәденов төленбеген айыппұлды толық немесе ішінара есептен шығару мәселесі қаралып жатқанын хабарлады. Министрлік амнистияға ілінетін айыппұлдың категориясы, мөлшері мен есептен шығару тәртібін жан-жақты пысықтайды.

«Амнистияға қауіпті қылмыс жасағандар, соның ішінде терроризм, экстремизм, сыбайлас жемқорлық сипатындағы қылмыс, кәмелетке толмағандарға жыныстық қысым жасау әрекеті, азаптау, сондай-ақ қайта қылмыс жасағандар мен іздеуде жүрген тұлғалар ілінбейді», — деді Сәденов.

Премьер-министр Олжас Бектенов Ішкі істер және Әділет министрліктеріне Бас прокуратурамен бірлесіп, екі аптада амнистияға қатысты ұсыныс енгізуді тапсырды.

Президент азаматтардың қауіпсіздігіне қатер төндірмейтін қылмыстарға ғана амнистия жариялауды ұсынғандықтан, мас болып рөлге отырғаны үшін жүргізуші куәлігінен айырылғандарға жеңілдік жасалмауы мүмкін. ІІМ өкілдері бұған дейін мас күйінде көлік тізгіндеу жүргізушінің өзіне ғана емес, жол бойындағы өзге адамдарға да қауіп төндіретінін айтқан. Полиция мұндай жүргізушілердің жазасын жеңілдетуге үзілді-кесілді қарсы.