ІІМ тіркеу ережесіне түзету енгізді. Бірақ көлікті мемлекеттік нөмірмен бірге сатуға мүмкіндік беретін норма құжатта жоқ. ІІМ Kolesa.kz редакциясына хабарлағандай, полиция барлық техникалық мәселені мұқият қарастыру үшін уақыт алып, оны 2026 жылы енгізуді жоспарлап отыр.
Қазіргі түзету жобасы биыл 28 қарашадан бастап күшіне енеді. Бұдан былай VIP-нөмір алған жеке немесе заңды тұлғаның (филиал немесе өкілдік) жаңа мекенжайының аймақ коды мемлекеттік нөмірдің аймақ кодына сәйкес келмесе, автомобильді сол нөмірімен тіркей алады. Мысалы, Алматыда машинасын сатқаннан кейін «әдемі» нөмірді сақтап қалған жүргізуші Астанада жүріп көлік алса, нөмірде Алматының 02 коды қалады.
Ережеде көлік иелері сұраныс көп нөмірлер тізімін электрондық үкімет порталы (ЭҮП) мен ақпараттандыру объектілерінен көре алады деп жазылған. Яғни, болашақта арнайы ХҚКО-да VIP-нөмірлер тұратын сөре болмайды.
Көлік есептен шыққан кезде нөмір ХҚКО-да 6 ай емес, 30 күн сақталады және осы мерзім ішінде тегін қайта алуға болады. 30 күн өтіп кетсе қайта әзірлеу үшін алым (2.8 МРП) төлейсіз.
Қолданыста болған сәнді нөмірді иесі мұрагері, ата-анасы, баласы немесе жұбайына ғана емес, асырап алушы, бауыр, ата, әже, немере сияқты туыстарына да бере алады. Ол үшін өтініш жазып, туыстықты растайтын құжатты қоса беру қажет.
Комментариев: 0