Алматы әкімдігінің баспасөз қызметі хабарлағандай, биыл жалпы көлемі 111 шақырымды құрайтын 120 көшеге жөндеу жүргізіліп, қаладағы он шағынауданда 100 км жол салынады.
Қаладағы жолдар мен тротуарларды жөндеу жұмыстарына қатысты кеңес өткізген Бауыржан Байбек көктем келісімен қаланың орталық бөлігінде де, аудандық маңызға ие көшелерде де беті ашық жатқан люктер мен шұңқырларға қатысты арыз-шағымның көбейгенін баса айтты.
— Қала тұрғындары жақсы жолдармен күзде ғана емес, жазда да жүруі тиіс. Сондықтан орташа жөндеу жұмыстарын жүргізу барысында жолдың әр бөлігін мерзімі, оны жөндеуге қатысатын адамдар мен техника саны бойынша бөлу керек. Жүргізіліп жатқан жөндеу жұмыстары бойынша ұзақ мерзімді келісімшарт жасалған, яғни компаниялар заманауи техника сатып алып, жұмыстың сапалы орындалуын қамтамасыз етуі тиіс. Мердігерлер жұмысты белгіленген мерзімде аяқтамаған жағдайда айыппұл салынуы керек. Аудан әкімдері әр бөлікті жеке аралаумен қатар, ғимараттардың алдыңғы жағына мән беріп, заңсыз құрылыстар мен өзге қызметтердің жұмыстарын қадағалауы қажет, — деді Бауыржан Байбек.
Қалалық мобильділік басқармасының басшысы Сағындық Телібаев ауа райы жайлы болған жағдайда магистральді көшелерге жүргізіліп жатқан жөндеу жұмыстарының он күн ішінде аяқталатынын айтты.
Беті ашық жатқан құдықтарға қатысты мәселені шешу үшін мердігер мекемелер арнайы техника алуда. Бұл елде алғаш рет құдықтарға жөндеу жұмыстарын жүргізу мақсатында мемлекеттік-жеке әріптестік жобасының аясында 4.5 жылдық мерзімге төрт компаниямен келісімшарт жасалғанының арқасында жүзеге асып отыр.
Қауіпсіз инфрақұрылым жасауға, жолдағы апат пен өлімді азайтуға бағытталған Vision Zero бастау алуының есебінен жөндеу жұмыстарын жүргізу барысында қауіпсіздік аралдары орнатылып, жаяу жүргіншілерге арналған жолақтар жасалады. Сонымен қатар, адамдардың жолдан қауіпсіз өтуін қамтамасыз ету мақсатында көше қиылыстарындағы бұрылу радиусын азайту мүмкіндігі қарастырылатын болады.
Кеңес барысында Бауыржан Байбек жұмысқа жауапты мемлекеттік органдар мен мердігер мекемелердің басшыларына қатысты байланыс ақпараттары жазылған арнайы стенд орнатуға және жақын маңдағы аумақты көгалдандыруға, бұрында жөнделген кепілдік мерзімдегі жолдарды тексеруге тапсырма берді.
Комментариев: 0