Үш жыл бұрын Kolesa.kz Өскемендегі «АЗИЯ АВТО» автокөлік құрастыру зауытында бір күн болып, жұмыс барысымен танысқан болатын. Сол кезде ондағы жұмысшылардың орташа 150 мың теңге (сол кездегі бағам бойынша 450 доллар) айлық алатынын білген едік. Жақында «Понедельник» басылымы АВТОВАЗ жұмысшыларының қазіргі жалақысын жариялады. Енді екі елдегі автозауыт қызметкерлерінің табысын салыстырып көруге болады.
Автоөндірушінің Тольятти мен Ижевскідегі зауытының жұмысшылары шамамен бірдей жалақы алады. Дәнекерлеу, қалыптаумен айналысатын жұмысшылар мен темір ұсталарына шамамен 35 мың рубль (қазіргі бағам бойынша 470 доллар) төленеді. Өндірістегі атқаратын қызметіне байланысты айырмашылық аса үлкен емес. Дәнекерлеуші 32-39 мың рубль, ал механикалық құрастыру бойынша темір ұстасы мен қалыптаушы 30-37 мың рубль алады. Басылым мәліметіне сенсек, бұл сол аймақтағы орташа жалақы деңгейімен бірдей. Сондай-ақ олардың Қазақстандағы әріптестерімен де бірдей табыс табатынын байқауға болады.
Әрине, автозауыт қызметкерлерінің бәрі жеңілдетілген тамақтану, жаттығу залы және жұмысшылар мен отбасы мүшелеріне арналған жолдамаларды қамтитын әлеуметтік пакетке ие болады. Соған қарамастан табыс мөлшерін жоғары деуге келмейді. Мысалы, Tesla жұмысшылары орта есеппен сағатына 36 доллар, айына 6200 доллар алады.
Комментариев: 0