АВТОВАЗ Lada Niva Travel-ді жаңартты

АВТОВАЗ Санкт-Петербургтегі форумда басты тұсаукесер ретінде Azimut кроссоверін көрсетті және жақсарған Lada Niva Travel-ді таныстырды. Бұл модельдің алдыңғы бөлігі өзгеріп, қуаты артқан жаңа қозғалтқыш алды.

Жаңа бампер, шағын тұманға қарсы шамдар, қорғаныш пластинасы және жаңа радиатор торының арқасында автомобильдің сырт келбеті заманауи бола түсті. АВТОВАЗ радиатор торының құрылымы қозғалтқыш бөлімін желдетуге көмектеседі дейді. Жарық техникасы, оның ішінде тұманға қарсы шамдары енді жарықдиодты.

1.8 литрлік 8 клапанды жаңа агрегат 90 ат күшін (153 Нм) береді. Мотор минутына 1000 айналым жасағанда 80 % тарту күшін бере алады. Бейресми дерек бойынша бұған алдыңғы жетекті Lada модельдерінің моторы негіз болған.

Жаңа мотор жол жағдайына қарай 3-тен 30 %-ға дейін отын үнемдейді және діріл деңгейі төмен.

Трансмиссияны қозғалтқышқа бейімдегеннің арқасында оның сапасы артыпты. Шассиде жаңа көлденең тұрақтандырғыш және желдетілетін дискілі тежеуіш (Lada Vesta-дан алды деген дерек бар) пайда болды.

АВТОВАЗ жаңа Niva Travel стендте, полигонда және жол жағдайында кешенді сынақтан өткенін хабарлады. Жаңа өнім саудаға шығуға дайын сияқты көрінуі мүмкін, бірақ іс жүзінде өндіріс 2025 жылдың аяғына қарай басталады. Жол талғамайтын көліктің бағасы белгісіз.