Калининградтағы «Автотор» компаниясының өкілдері жаңа марка көліктерін құрастыратынын мәлімдеді. Қазір зауыттағы мамандар қалған бөлшектерден техниканың соңғы легін шығарып жатыр, қазаннан бастап конвейерде ауыс-түйіс болады.
— Қазан айында өндіріс орнын қайта жөндеп, баптаймыз, содан соң Ресейдің де, біздің де жаңа даму бағытымызға сай бейімделген жаңа модельдер өндірісін бастаймыз. Не өзгереді? Алдымен жаңа серіктес келеді. Біз жаңа автомобиль шығарамыз. Келер жылы өндіріс көлемін арттыруды көздеп отырмыз, — деген компания басшысының сөзін Drom.ru жазды.
«Автотор» BMW көліктерін, сонымен қатар Hyundai мен Kia-ның бірнеше моделін шығаратын. Компания болашақта дәл қандай маркамен жұмыс істейтіні белгісіз, бірақ арасында дәстүрлі техникадан бөлек электромобиль де болуы мүмкін.
Қазір Ресейдегі тағы бір автозауыттың тағдыры шешіліп жатқанын айта кеткен жөн. ТАСС басылымы Nikkei газетіне сүйеніп берген мәліметке сенсек, Mazda Motor Владивостоктағы «Мазда-Соллерс» кәсіпорнында техника жасаудан мүлде бас тарту мүмкіндігін қарастырып жатқан көрінеді.
Mazda CX-5, CX-9 кроссоверлері мен Mazda 6 седанын және 2 литрлік Skyactiv-G бензинді моторын шығаратын орын логистика мәселесіне байланысты мамырдан бері жабық тұр.
Комментариев: 0