Автоөндірушілер жаппай алюминий сымға көшіп жатыр

Tesla алюминий сымды алғаш пайдаланған компаниялардың бірі, марка 2019 жылғы Model Y-дың батареясы мен электромоторын жалғайтын жоғары кернеулі желіні осы материалдан жасаған. Кейін бұл тәжірибені BYD, Zeekr, Li Auto және Xiaomi жалғастырды, енді еуропалық өндірушілер де осы жолға түсіп отыр.

Reuters агенттігінің сауалына жауап берген Ferrari өкілдері алюминийді таңдауға оның мыстан біршама жеңіл болғаны әсер еткенін айтты. Бұл 296 гибриді, батареялы Luce сияқты ауыр спорткарлар үшін аса маңызды. Мысалы, алюминий пайдаланғанның арқасында 296 моделінде сымдардың салмағы 20 % жеңілдеген.

Ал BMW алюминийді ток өткізгіш материал ретінде алғаш рет 2011 жылы 1-сериялы шағын моделінде сынақтан өткізгенін айтып, бұл салада өзінің бастамашы екенін еске салды. Қазір бренд металды гибридтері мен электрокарларына көптеп пайдаланып жүр. Құрамына кіретін маркалар кейінгі кезде алюминий сымға көшіп жатқанына қарамастан, Stellantis альянсы агенттікке пікір білдіруден бас тартыпты.

Автомобильдің электр жабдықтарына алюминий пайдалануға технологиялық фактор ғана емес, оның мыстан төрт есе арзан болғаны да әсер етіп отыр. Бірақ пайдалану сипаттамасы жағынан алюминийдің әлсіз тұстары бар, ол мыс не болат клеммамен түйіскен жерде гальваникалық коррозияға бейім, сондай-ақ аса иілгіш материал емес.