Автокөлікке арналған 5G желісі

Жылдам ақпарат алмасуға мүмкіндік беретін желілік инфрақұрылымды әзірлеу «ақылды» жолдар мен автопилотты машиналардың дамуына негіз болады.

Қытайлық Huawei компаниясы 5G байланыс желісіне арналған құрылғылар жасайтын әлемдік деңгейдегі үздік өндірушілердің бірі. Сол себепті жаңа «5G автокөлік экожүйесін» жасау уақыт еншісіндегі мәселе еді. Аса ауқымды жобаны жүзеге асыруға елдегі FAW Group, Changan Automobile, Dongfeng Group, SAIC Group, BYD, Great Wall Motor сынды алпауыттар қатысты.

Көлік өндірісіне 5G форматын енгізу машиналардың өзара жылдам ақпарат алмасып, спутник сынды инфрақұрылым объектілерінен мәлімет алуына жағдай жасайды. Өткен жылы Huawei бесінші деңгейлі байланыс желісіне компания әзірлеген модем арқылы қосылған автокөліктерге арналған алғашқы 5G-модульді таныстырды.

Айтпақшы, біраз уақыт бұрын Geely фирмасының жер төңірегіндегі орбитаға машина тұрған орынның асқан дәлдікпен көрсетілуін қамтамасыз ететін мыңдаған микроспутниктен тұратын топтама жібергені туралы ақпарат тараған. Егер Huawei мен Geely-дің жоспары іске асса, Қытай автокөлікті компьютерлеу мен дербестік деңгейін арттыру саласында көш бастауы әбден мүмкін.