Aurus маркасы Hongqi-мен серіктес бола ма?

Hongqi моделін Aurus атынан шығару туралы келіссөз жүріп жатыр деген ақпарат қыста тарап, Ресей брендінің логотипін Hongqi көліктері алады деген сыбыс шыққан.

No Limits телеграм-каналы Ресейдің Өнеркәсіп және сауда министрлігі Aurus-қа серіктес тауып, бұрынғы Toyota зауытын қайта іске қосу үшін Қытайдағы әріптестерімен келіссөз жүргізіп жатыр деп жазды. Өйткені «Hongqi-ден басқа ешкім онда жұмыс істей алмайды».

Премиум марканың қытайлармен туыс болғалы жатқаны таңғалатын жаңалық емес. Мәселен, «аурустардың» электронды басқарылатын пневматикалық аспасын әу бастан CASE фирмасы жасап жатыр. Саяси жағдайларға байланысты процесс кейінгі кезде тіпті күрделеніп, үдей түсті. Aurus өз идеясын жүзеге асыруға көп күш пен қыруар ақша кететінін, дайын көлік ала салған әлдеқайда тиімді екенін жақсы біледі. Бұрын Еуропаға көз тіккен компания енді шығысқа бет бұрды.