Volkswagen концернінің электромобильге арналған MEB платформасында жасалатын машиналар қатары артты.
VW ID.4 және Skoda Enyaq iV-ден кейін Audi модельдері дайындала бастады. Классикалық жол талғамайтын көлік Q4 e-tron мен оның купе тәрізді нұсқасы Q4 e-tron Sportback-тің шанақ ұзындығы бірдей — 4,58 метр. Олар Audi-дің бүгінге дейінгі ең шағын электромобилі саналады.
Техникалық жағынан екеуі бірдей. Алғашқы жүздікті 9 секундта алатын базалық нұсқасына 170 ат күшіне ие электромотор мен 341 шақырымды еркін еңсеретін батарея орнатылады. 204 ат күшін беретін, алғашқы жүздікті 8.5 секундта алып, 520 км жол жүре алатын анағұрлым қуатты нұсқасы да бар.
Толық жетекті көлік 299 ат күшіне ие. 488 шақырымды еркін жүріп өте алатын бұл нұсқа алғашқы жүздікті 6.2 секундта еңсереді. Машинаның жылдамдығы сағатына 180 шақырыммен шектелген. Көлікте жылдам қуаттау функциясы бар. Ол 130-шақырымда 10 минутта қуат алуға мүмкіндік береді.
Аспасын да өз талғамыңызға сай таңдай аласыз. Толық жетекті көлік ауыспалы тісті рөл механизмімен автоматты түрде жабдықталса, артқы жетекті көлікте ол опция ретінде ұсынылады. Оптикасы жарықдиодты, дөңгелек дискілерінің диаметрі 19-21 дюйм.
Қос машина да 10.25 дюймдік цифрлы аспаптар панелімен, дауыс арқылы басқарылатын және 10.1 не 11.6 дюймдік сенсорлы экраны бар мультимедиамен, ескертуді алдыңғы әйнекке шығаратын проекциялық дисплеймен жабдықталады. Жүксалғыш көлемі 520-535 литр.
Audi Q4 e-tron/ Q4 e-tron Sportback Цвиккау қаласындағы зауытта жасалады. Өз отанында жазда сатылымға шығады. «Қарапайым» Q4-ті 41 900 еуроға алуға болады, ал Q4 Sportback-тің бағасы — 43 900 еуродан басталады.
Комментариев: 0