Aston Martin көлік дөңгелегін ақылды шинамен қаптайды

Aston Martin өз топтамасына Pirelli мен Bosch бірлесіп жасаған ақылды Cyber Tires шинасын орнататынын хабарлады.

Cyber Tire шинасындағы протектордың ішкі бөлігінде Bluetooth арқылы көліктің борттық электроникасына қосылатын сезгектер бар.

Қарапайым шина қысымын бақылайтын жүйемен салыстырғанда, Cyber Tires технологиясының мүмкіндігі әлдеқайда көп. Ақылды шина қысымды өлшеп қана қоймай, резеңкенің қызу деңгейін анықтайды, әр дөңгелекке түсетін жүктемені есептейді, қанша протектор қалғанын өлшейді және жолмен ілінісу деңгейін болжайды.

Басқару блогы жиналған деректерге сәйкес тежеу күшін, тұрақтандыру жүйелерінің жұмысын, газ педалінің сезімталдығын және электромобильдегі рекуперация деңгейін бірден реттей алады.

Aston Martin — Pirelli-дің жаңа өнімін орнатқан бірінші өндіруші емес. Cyber Tires шинасын шағын сериялы Pagani Utopia гиперкары таққан, бірақ Aston Martin-ді бұл технологияны жаппай шығатын автомобильде қолданған алғашқы бренд десе болады. Ақылды шинасы бар машиналар қашан сатылатыны әлі белгісіз.