Елордадағы жүрдек трамвай желісі нақты қашан ашылатыны соңғы сәтке дейін белгісіз болды. Өткен жұмада Астана әкімінің орынбасары Ерсін Өтебаев LRT жексенбі, 17 мамырдан бастап жолаушы таситынын айтқан. Бірақ сенбі күні қызметін бастады. Жауапты мекеменің дерегінше жерүсті метросының ашылу рәсімі кейінге қала жаздады.
LRT операторы City Transportation Systems хабарлағандай, жолаушылар:
- платформадағы төтенше тежеу батырмасын себепсіз басқан;
- пойыз ішіндегі қорғаныш әйнегінің артындағы платформа есігін шұғыл ашатын батырманы басқан;
- вагон есігін іштен өз бетінше ашуға тырысқан;
- қолын есік арасына салып, есіктің жабылуына әдейі кедергі жасаған.
Салдарынан пойыз шұғыл тоқтапты.
«LRT жүйесі толықтай автоматты, мұндай әрекет қауіпсіздікке қатер төнген сияқты қабылданады. Салдарынан диспетчерлер пойызды тоқтатып, қосымша тексеріс жүргізді», — деп түсіндірді CTS өкілдері.
Компания ереже бұзған азаматтар станция мен вагондағы бейнебақылау камерасы арқылы анықталғанын хабарлады. Компания бүкіл материалды құқық қорғау органдарына жолдайды, олар жолаушылардың қауіпсіздігіне қатер төндіріп, LRT жұмысына кері әсер еткендерге қатысты қылмыстық іс қозғауы мүмкін.
Комментариев: 0