Астана — Қорғалжын трассасында жарық шашатын жол таңбасы сынақтан өтіп жатыр

Жаңа технология Астана — Қорғалжын жолының апат жиі болатын 23-шақырымында сынақтан өтіп жатыр. «ҚазАвтоЖол» ҰК» АҚ хабарлағандай, бұл жол бөлігін таңдау кездейсоқ жағдай емес. Мұнда көлік көп жүреді, сондай-ақ ауа райы жиі құбылып тұрады. Кейінгі үш жылда мұнда алты жол апаты болған.

Фосфорлы бояу күндіз жарық энергиясын сіңіріп, қараңғыда қайта шығара алады. Соның арқасында жарық жеткіліксіз жерде және түнгі уақытта жол таңбасы анық көрінеді.

Әдеттегі жол таңбасынан айырмашылығы, жаңа жабын қозғалыс жолағын белгілеумен қатар, жүргізушілерге бағдар беріп тұрады. Мұндай белгі қалааралық трассаларда, жарық түспейтін жол бөліктерінде, бұрылыста, жолайрықта және қауіпті аймақтарда өте қажет.

Сынақ кезінде «ҚазАвтоЖол» мамандары жарық қаншалық анық түседі, материал тез тоза ма, жауын-шашын мен температура өзгерісіне төзімді ме деген сұрақтар бойынша бақылау жүргізеді. Сондай-ақ жаңа жол таңбасы жүргізушілерге қалай әсер ететінін зерттейді. Сынақ оң нәтиже көрсетсе, бұл технологияны елдегі өзге автожолдарға енгізу жоспарда бар.