Әскери «гелендваген» рестомодқа айналады

Ұлыбританиядағы Arcade Cars ательесі Mercedes-Benz G-класқа негізделген ерекше рестомодты көрсетті. Жобаның әзірге атауы жоқ, тек ателье көліктің он данасын жасайтыны белгілі. Көп адам біле бермейтін модификацияның жалпы тиражы жетпістен аспаған. Мамандар бастапқыда оны әуеден түсіруге болатындай етіп жасаған.

1980 жылдары Mercedes-Benz Сингапур армиясының тапсырысы бойынша ұшақтан парашютпен түсетін арнайы модификация әзірледі. Көліктің салмағы барынша жеңіл болуы үшін инженерлер базалық үш есікті 240 D моделін база етіп алды.

Артық салмақтан арылмақ болған автомобиль шатырсыз қалды, бүйірлік есік орнында арнайы қақпа тұр. Ыңғайлы болу үшін алдыңғы әйнегі капотқа қарай бүктеледі. Осындай 60-70 машина жарық көрді деген мәлімет бар.

Бүгінге дейін нешеуі сақталғаны белгісіз, бірақ Arcade Cars он рестомод құрастыратынын айтты. Олар әр кабриолетті толық реставрациялап, салонын қымбат былғарымен қаптайды және жақсарған аудиожүйе, электр көмегімен реттелетін орындық сияқты опциялар орнатады.

Рестомодтардың қозғалтқышы ауыса ма, әзірге белгісіз, жобаның тұсаукесері қазанда өтеді. Машина мүлде басқа күштік құрылым алуы мүмкін. Arcade Cars классикалық «гелендвагенді» қалпына келтірумен шектелмей, оған электромотор орнату арқылы да танылған.