28 жастағы Қызылорда облысының тұрғыны «клиенттерін» оңтүстік астана мен өзі тұратын аймақтан іздестіріпті. Алматы қалалық Полиция департаментінің баспасөз қызметі хабарлағандай, күдікті өзін коллекторлық компанияның қызметкерімін деп таныстырып, қолында кепілге алынған көліктердің барын айтқан.
Құрбандарын әр сөзіне сендіре білген алаяқ әр қадамын мұқият ойластырып, асықпай әрекет еткен. Ең алдымен ол өз ақшасына сатып алған аса қымбат емес әрі жаңалау көлікті сату жөнінде хабарландыру берген. Сатып алушымен сөйлесе келе өзінің коллектор боп жұмыс істейтінін және кепілде тұрған судай жаңа көлікті оған нарықтағы құнынан төмен бағаға алып бере алатынын айтып, 100 пайыздық алдын ала төлемді талап еткен. Қолына ақша түскен «коллектор» телефонын өшіріп, ғайып болғанда ғана арзан дүниеге құныққандар алаяққа алданғанын түсінген.
Медеу аудандық Полиция басқармасының деректеріне сүйенсек, осындай жолмен әлгі әйел Алматы мен Қызылорда облысының 20 тұрғынын қақпанына түсіріпті. Қазір ол ұсталып, бұрын да қылмыстық жауапкершілікке тартылғаны анықталды. Тәртіп сақшылары осы әйелдің алаяқтық әрекеттерінен зардап шеккен азаматтар болса, 254-48-01, 254-48-02, 254-48-03 немесе102 нөмірлері арқылы хабарласуын сұрайды.
Комментариев: 0