1971 жылы «Сафари» раллиінде Datsun 240Z бірінші, екінші және жетінші орын алды. Мұндай жетістік ұмытылмайды, сондықтан компания оның ізбасары болар деген үмітпен Juke Rally Tribute-ті жұрт назарына ұсынды. Бірақ әзірше рендер түрінде ғана. Мұның жай қиял емес, корпоративті өнім екенін ескерсек, оның іс жүзінде жарық көруі әбден мүмкін.
Ралли болиді 117 ат күшіне ие HR10DDT турбоүштік орнатылған азаматтық Juke негізінде жасалады. Шағын кроссоверге күшейтілген аспа, жолсыз жермен жүруге арналған өзгеше дөңгелек, алдыңғы ауа тартқыш, капотпен біріктірілген қосымша шамдар мен «люстралы» рейлинг орнатылып, асты қорғалған. Жүксалғыштың көлемі шектеулі болғандықтан, екі қосалқы дөңгелек сыятындай етіп артқы әйнекті алып тастауға тура келді. Мұржасы артқы бампердің дәл ортасында тұр.
Концепт авторлары батыл, жалынды, әрі шынайылықтан алшақ темір тұлпар жасады. Оның Juke жүргізушілерінің назарын аударатыны анық. Сондықтан рендердегі кейбір дүниелер болашақта опция ретінде ұсынылуы мүмкін.
Айтпақшы, қазақстандық шабандоз Артур Ардавичус осыған ұқсас көлік жасаған болатын. Шанағы Juke, рама мен шассиі Pathfinder R51-ден алынған және STILLEN компрессорлы моторы (5.6 л) орнатылған машина біздің назарымыздан тыс қалмады.
Комментариев: 0