Арменияда тіркелген оң рөлді көлікпен трассаға шығуға рұқсат жоқ

1 желтоқсанда Арменияда тіркелген көлік мінетін ондаған жүргізушінің Атырау — Доссор тас жолында жиналғаны туралы видео әлеуметтік желіде тарады.

Посмотреть эту публикацию в Instagram

Публикация от АТЫРАУ | ҚАЗАҚСТАН | 06 🌷 (@atyrauoil.official)

Atyrauoil паблигі хабарлағандай, олар тәртіп сақшылары шектеу қоятындықтан негізгі табыстан айырылып отырмыз деген, сол себепті жолға шығуға мәжбүр болған. Көлік иелері полиция күнде алдын алу шараларын жүргізеді және машинаны тоқтатып, тексереді, кейде мүлдем қалааралық сапарға шығармайды деп шағымданды.

«Біз адал жұмыс істейміз, бірақ полиция күнде тексереді, айыппұл салады және талаптар қояды. Бәрінде несие, бала-шаға бар. Қалай өмір сүреміз? Қыс келді, үйге азық-түлік алу керек. Жұмыс істеуге мүмкіндік беріңіздер. Заң бұзып жатқан жоқпыз. Машина техбайқаудан өткен, бірақ бізді трассаға шығармайды. Қылмыскердей қарайды. Біз отбасымызды асырап жүрміз», — деді олар.

Патруль жиналғандардың талабын полиция департаментінің басшыларына жеткізуге уәде берді, шенділер ресми жауап береді.

1 желтоқсанда ереуілге қала арасында жолаушы таситын жүргізушілер шыққан сияқты. Алайда «Автомобиль көлігі туралы» заң бойынша оң рөлді автомобильмен такси қызметін атқаруға болмайды.

2023 жылдан бастап Қазақстан азаматы елде шетелдік нөмір таққан көлікті тізгіндей алмайды. Мұндай машинаны сақтандыру мүмкін емес, ал онсыз жүргізуге рұқсат жоқ. Бұған қоса биыл өлімге әкелген жол апаттардың көбіне минивэн қатысқан. Осыдан кейін полиция «альфард», «одиссей» сияқты модельдерді қатаң бақылауға алды.

04.12.2025 ж. 10:00-де қосылған мәлімет:

Жүргізушілермен кездесуге барған полиция оң рөлді көлік иелеріне бір ай бұрын соңғы рет ескерту жасағанын, шетелде тіркелген және оң рөлді автомобильмен жолаушы тасу заңсыз екенін айтты. КТК телеарнасының мәліметінше өңірде қазір шамамен 4 мыңға жуық оң рөлді көлік бар.

«2023 жылы мемлекет басшысының қаулысына сәйкес көлік заңдастыру акциясы өтті. Сол кезде 2022 жылдың 1 қыркүйегіне дейін елге кірген машиналарды толық тіркедік. Тіркеу құны 215 мың теңге болған. Қазір оң рөлді автомобильді рәсімдеуге болмайды. Қалғандарын заңдастыра алмаймыз, өйткені мерзімі сәйкес емес», — деп түсіндірді Атырау облысы ПД Әкімшілік полиция басқармасы бөлімінің бастығы Жеңіс Дәулетов.

Полиция такси қызметін атқарып жүрген автомобильдің басым бөлігі өңірде заңсыз жүргенін, құжаты талапқа сай келмейтінін және онымен жолаушы тасуға тыйым салынғанын атап өтті.