Ақтөбеде полиция мен жергілікті билік жаяу жүргінші өткелдеріне ескертетін жазуы бар жаңа жол таңбасын салып жатыр. Бұл жол қозғалысына қатысушылардың, әсіресе жан-жағына қарамайтын жаяу жүргіншілердің назарын аудару үшін қажет.
Kolesa.kz редакциясы жаяу жүргінші мына ережелерді сақтауға тиіс екенін еске салады:
- жолды тек жаяу жүргінші өткелі арқылы, соның ішінде жерасты және жерүсті өткелдерімен өтуге тиіс, олар көрінетіндей жерде болмаса тротуар немесе жол жиегі сызығы бойымен өтуі керек;
- көз көрім жерде өткел де, қиылыс та болмаса, жолды екі жағы да жақсы көрінетін жерден тігінен кесіп өтуге болады. Бөлгіш жолақ, арнайы қоршау не таңба (бүтін не қосарлы жол таңбасы мен қоршау әдетте қауіпті жерде тұрады) болса, жолды өткелден басқа жерден кесіп өтуге болмайды;
- қозғалыс реттелетін жерде жаяу жүргінші реттеушінің немесе жаяу жүргіншілерге арналған бағдаршамның, олар болмаған жағдайда көлік бағдаршамының белгілеріне бағынуы керек;
- реттелмейтін жаяу жүргінші өткелінде жолға шығар алдында келе жатқан көліктердің қашықтығы мен жылдамдығын бағалап, жолдан өту қауіпсіз екеніне көз жеткізгеннен кейін ғана өтуге болады. Жолды жаяу жүргінші өткелінен тыс жерден кесіп өткенде көлік қозғалысына кедергі келтіруге және жақындап келе жатқан көлік жоқ екеніне көз жеткізбей, жолға кенет шығуға болмайды;
- жолға шыққаннан кейін қозғалыс қауіпсіздігі үшін қажет болмаса, себепсіз тұруға немесе тоқтауға болмайды. Өтіп үлгермеген жағдайда жаяу жүргінші қарсы бағыттағы көлік ағынын бөлетін сызықта тұруға тиіс. Қозғалыс қауіпсіз екеніне көз жеткізген соң және бағдаршам (реттеуші) сигналын ескере отырып қана өтуге болады;
- жыпылықтайтын маягы мен арнайы сигналы қосылған көлік жақындап келе жатқанда жолдан өтпеу керек, жаяу жүргінші жолдың үстінде тұрса, ондай көлікке жол беруге міндетті.
Жол ережесінде жоқ, бірақ өте маңызды кеңестер:
- Зебра арқылы өтетін кезде балаңыздың қолынан ұстаңыз, сәби болса көтеріп алған дұрыс.
- Қызыл шамның соңғы секундтарында, көліктер жоқ, көше бос сияқты көрінсе де, жолдан өте бастамаңыз. Бұл — балалар үшін жаман үлгі. Олар әрекетіңізді қайталауы мүмкін.
- Балаңыз зебрадан тіпті сіз қасында жүрсеңіз де велосипед немесе самокат мініп өтпеуге тиіс. Төтенше жағдайда велосипедтегі баланы көліктің астынан шығару қиын болады.
- Жолдан өтер алдында құлаққапты шешіңіз. Бұл айналадағы жағдайды жақсырақ бақылап, жақындап келе жатқан көлікті немесе дыбыс сигналын естуге мүмкіндік береді.
- Жолдан өтер алдында смартфонды қоя тұрып, жан-жағыңызға қараңыз, тротуарға жеткенше ештеңеге назар аудармаңыз.
Жолда абай болыңыз!
Комментариев: 0