Ақтауда жүк көлігін мінген тұрғын полициядан қашты

29 шілдеге қараған түні 1:30 шамасында полицейлер Өмірзақ ауылының маңында жүрген DAF-ты байқаған. Олар неден күдіктенгені белгісіз, бірақ Маңғыстау облысының полиция департаменті полиция ауыр техниканы тоқтатпақ болды деді. Жүргізуші газ педалін барынша басып, сытылып кетуге тырысқан. Жол белгілерін мүлде елемеген ол қарсы бетке шығып кетіп, апатқа себеп бола жаздады.

Тәртіп сақшылары тартқыш көліктің алдына лиана деп аталатын арнайы таспа тастап, қашқынды әрең ұстады. Рөлде жүк тасумен айналысатын Түркістан облысының тұрғыны отырыпты. Қажет құжаттары қолында болса да, азамат медициналық тексерістен өтуден бас тартқан.

Полиция жүргізушінің атына бірнеше хаттама толтырды:

• полиция қызметкерлерінің заңды талабына бағынбау;
• маневр жасау ережелерін бұзу және қарсы бетке шығу;
• медициналық тексерістен өтуден бас тарту;
• жол белгілерін елемеу;
• апаттық жағдай жасау.

Машина айыптұрақта тұр. Материалдар сотқа жолданды. Жүргізуші айыппұл төлеуден бөлек 15 тәулікке қамалып, көлік басқару құқығынан 8 жылға айырылуы мүмкін.