Бүгін таңертең Ақтауда қоғамдық көліктің 80 пайыздан астамы жолға шықпады. Lada.kz хабарлағандай, жүргізушілер бұған дейін бірнеше рет «Caspian Trans Corporation» ЖШС, «Каспий Авто Парк» ЖШС басшылығына, сондай-ақ облыс әкімдігіне, еңбек инспекциясы мен қалалық прокуратураға жүгінген. Мәселе шешілмеген. Олардың басты талаптары: жалақыны көтеру, еңбек жағдайын жақсарту және толық әлеуметтік пакет алу.
«Біз шаршадық, ал басшылық бізді естімейді. Жалақыны жалбарынып сұрап аламыз. Еңбекке уақытша жарамсыз болған күндер төленбейді, дұрыс жұмыс істеуге жағдай жоқ, тіпті дәретхана да жоқ. Таңғы бестен кешке дейін жұмыс істейміз. Әлеуметтік пакет те жоқ», — деп шағымданды жүргізушілер.
Ереуілге шыққандар компания басшылығы және прокуратура өкілдерімен жүргізген келіссөзден кейін тараптар мәмілеге келді.
«Шілде мен тамызда күндік төлем 28 мың теңгеге дейін көтерілетін болды. Келесі тоқсанда, яғни қыркүйектен бастап 35–40 мың теңгеге дейін көтеру мәселесі қаралады. Біз 40 мың теңге сұрадық. Кездесу барысында барлық талабымызды айттық, олар қысқа мерзімде қаралады. Қазір ереуіл аяқталды, жүргізушілер борт парақтарын алып, жолға шығып жатыр», — деді жүргізушілердің бірі.
Комментариев: 0