Келеңсіз оқиға Луизиана штатына қарасты Слайделл қаласындағы Chevrolet автосалонында болған. Жергілікті полиция хабарлағандай, түн жамылып келген ұрылар 31 автокөліктің дөңгелегін шешіп алған да, неге екені белгісіз, тек бір көлікке «жанашырлық танытып», бүтін күйінде қалдырып кетіпті. Қылмыскерлер Chevrolet Malibu, Tahoe, Blazer, Traverse, Suburban және Silverado өндірушілері шығарған дискілер мен резеңкелерді үптеп кетіпті. Тәртіп сақшыларының айтуынша, салонға нағыз кәсіби ұрылар түскен, себебі олар дабыл қаққыш пен бейнебақылау камераларын өшіріп, көше жақтан көзге түсіп қалмас үшін тұрақтағы жарық шамдарды да сөндіріпті.
Бұрын осыған ұқсас ұрлықтар Техас пен Оклахома штаттарында тіркелген. Полицейлер Луизианадағы ұрлық та солардың ісі деп пайымдап отыр. Өз кезегінде, Chevrolet автосалоны қылмыскерлерді құрықтауға жәрдем беретін кез келген ақпаратты берген адамға 25 000 доллар беретінін мәлімдеді. Соманың жартысын ақпарат беруші қылмыскерлер қолға түскенде, ал қалған бөлігін сот үкімі шыққан соң алады.
Комментариев: 0