Алты жүзге жуық Lada Niva Travel сервиске шақырылады

Росстандарт Ресейде 2021-2022 жылдары сатылған 593 Lada Niva Travel-ды сервиске шақыратынын хабарлады. Бұған стартер сымын қосатын клемманың қорғаныс қаптамасымен жанасу қаупі себеп болған. Кей жағдайда ақау салдарынан от тұтануы мүмкін.

Мамандар жол талғамайтын көліктегі сымды тексеріп, қажет болса оны ауыстырады. Кампания қамтитын көліктердің VIN-нөмірін сілтеме арқылы білуге болады.

Аталған мәселенің Қазақстан нарығына арналған машиналарға да қатысы барын айта кеткен жөн. Қолда бар ақпарат бойынша мұндай 116 көлік бар. Олар иесіне жетпей тұрып тексерілген, сондықтан орталыққа барудың қажеті жоқ. Ақау ақпанда 2.7 мың модельден табылды.