Алты орынды Tesla Model YL қытайларға ұнамады

Tesla Model Y-дың дөңгелек базасы ұлғайған, үш қатарлы нұсқасын Қытайдағы дилерлер сата бастады. CarNewsChina оны көруге барған азаматтардың да, журналистердің де көңілі толмады, үшінші қатар ел күткендей болып шықпаған деп жазды.

Тілшілер үшінші қатардағы орындықтар биіктігі 100 мм басқышта тұрғандықтан ыңғайсыз деп түйген. Бойы 170 см жолаушы үшін аяқ қоятын жер тар деуге келмейді, алайда кроссовер купе пішінді, сол себепті басқа тарлық етеді. Ойлы-қырлы жермен жүргенде мұнда отырғандар төбесіне басын соғыл алуы мүмкін.

Электрокардың артқы әйнегі ыңғайсыз, ол үшінші қатарда отырған жолаушылардың басына тым жақын орналасқан. Әйнек күн сәулесін өткізсе, қызып кету, тіпті күйіп қалу қаупі артады екен.

1 / 5

• 
• 
• 
• 
• 

1 / 5

Тілшілер орындыққа да шүйлігіп, тым кішкентай, бүйірлік тіреуіші мүлде жоқ деді. Креслодағы жылжымалы шынтақ тірегішті көтерген кезде отырған кісінің санын не қолын қысып қалуы ықтимал, салон жолаушыға толы болса, жүк қоятын орын қалмайды.

Жаңа модельдің тарлығына таңғалудың қажеті жоқ, себебі ол — сегменттегі ең кіші үш қатарлы кроссовер. Аспан асты елінде Tesla Model YL екі мотормен сатылады, ең арзаны 339 мың юань (25.5 млн теңге) тұрады. Бренд оны қыркүйекте жеткізе бастайды.

АҚШ-тағы басылымдар үш қатарлы машина Model X-ті қалтасы көтермейтін отбасылы тұрғындарға арналған сәтті өнім болуға тиіс еді деп жазды. Бірақ Илон Маск оның болашағына күмән келтіріп, бұл электрокар 2025 жылдың аяғына дейін Америка нарығына шықпайды, мүлде шықпауы да мүмкін деп мәлімдеген. Компания басшысы оған қарағанда роботаксиге ақша салған әлдеқайда тиімді болатынына сенімді.