Алматыдағы жаңа трамвай қай көшелермен өтеді

Алматыда 25–27 қаңтар аралығында қаланың 2040 жылға дейінгі даму бағытын белгілейтін жаңа бас жоспар талқыланып жатыр.

Құжатқа сай мегаполисте алғашқы жеңіл рельсті көлік желісі (LRT) 2025–2030 жылдар аралығында дайын болады. Ол қаланың батысындағы «Барлық» базарынан Төле би көшесінің бойымен Желтоқсанға дейін созылады, одан солтүстікке қарай Алматы-2 вокзалына, одан әрі Райымбек даңғылы арқылы қаланың шығыс шекарасына бет алады. Жол ұзындығы 31 шақырым болады.

Tengrinews.kz порталы «Алматыбасжоспар» ҒЗИ" ЖШС бас директоры Асхат Садуовқа сілтеме жасап хабарлағандай, LRT жобасына Торайғыров және Момышұлы көшесінде бұрыннан бар жолдарды пайдалануға болады. Олар Жароков көшесінің Төле биге дейінгі бөлігімен бірге LRT желісінің екінші кезеңіне енеді. Бұл кезеңнің құрылысы 2027–2032 жылдарға жоспарланған.

Ұзындығы 29 км болатын үшінші желі қаланың төменгі бөлігінде батыстан шығысқа қарай салынады, ол ҮАК және Хмельницкий көшесінің бойымен өтеді. Ал бір тармағы солтүстікке бет алып, Боралдайда салынатын Алматы-3 вокзалына барады.

Кейінгі 10 жылда шенділер Алматы қаласы мен облыста LRT желісін салу жайлы көптеген жоба ұсынды, жоғарыда біз жазған жоба да соның бірі. 2019 жылы құрылыс басталатыны туралы ақпарат шыққан, бірақ бәрі сызба мен жоспар күйінде қалды. Ал былтыр Қонаев қаласына (бұрынғы Қапшағай) осындай желі тарту жобасы жасалды.