Оқиға 21 наурызға қараған түні сағат 3:30-да болған. Әл-Фараби даңғылы мен Мендіқұлов көшесінің қиылысында Mercedes-Benz пен Zeekr 9X бетпе-бет соғылды. «Мерседес» рөліндегі 29 жастағы азамат пен 20 және 22 жастағы екі жолаушы оқиға орнында көз жұмды. Ал «Зикр» жүргізушісін дәрігерлер емханаға жеткізді.
Апат кезінде Zeekr 9X-ті 32 жастағы алматылық кәсіпкер тізгіндепті. Әлеуметтік желіде электрокар түнгі жарысқа қатысқан деген ақпарат тарады, оған Алматы полициясының жоғары лауазымды қызметкеріне тиесілі қызметтік көлік те қатысуы мүмкін деген сыбыс тарады. Сондай-ақ желі қолданушылары кәсіпкердің жеке электромобиліне 100QR02 нөмірін тағып жүргенін анықтаған.
ҚР ІІМ тергеуді ерекше бақылауға алып отыр. Ішкі істер министрі Ержан Сәденовтің бұйрығымен Алматы полиция департаменті бастығының жол қауіпсіздігіне жауапты орынбасары, әкімшілік полиция және қоғамдық қауіпсіздік басқармасының басшылары жұмыстан кетті.
«Зикр» жүргізушісің жағдайы тұрақтанған соң бірден қамалды. Оның қанынан алкоголь табылыпты. Қылмыстық кодекстің 345-1-бабының 4-бөлігі бойынша (алкогольге масаң күйде жол ережесін бұзып, абайсызда екі немесе одан да көп адамның өліміне себеп болу) ер адам 10 жылға дейін түрмеге қамалып, өмір бойына көлік жүргізу құқығынан айырылуы мүмкін.
Мемлекеттік нөмірді заңсыз беру дерегі бойынша және Алматы ПД басшыларының бірінің жүргізушісі — сержантқа қатысты бөлек қылмыстық іс қозғалды. Қылмыстық кодекстің 370-бабының 4-бөлігіне (қызметтік міндетін орындамау) сәйкес 7 жылға дейін бас бостандығынан айыру жазасы қарастырылған.
«Менің тапсырмам бойынша Алматыға Өзіндік қауіпсіздік департаментінің, Әкімшілік полиция комитетінің және Жеке құраммен жұмыс жөніндегі департаменттің мамандары аттанды. Жан-жақты тексеру жүріп жатыр. Бірқатар басшы жұмыстан босатылды. Барлығына құқықтық баға берілетінін ерекше атап өтемін. Ешкім жауапкершіліктен жалтара алмайды. Заң бәріне ортақ», — деп жазды министр Ержан Сәденов Instagram парақшасында.
Комментариев: 0