Қалалық әкімдік бұл схема сынақ ретінде іске қосылғанын хабарлады. Қалалық жол қозғалысын ұйымдастыру және жолаушылар көлігі басқармасының мәліметінше «Тастақ» базары аумағында 30 маусымнан бастап көліктер былай жүреді:
- Қарасай батыр көшесі бойымен Розыбакиевтен Варламовқа дейін — батыс бағытта;
- Құлымбетов көшесі бойымен Варламовтан Розыбакиевке дейін — шығыс бағытта.
«Өзгеріс Алматы қаласы ПД Әкімшілік полиция басқармасымен бірге жүзеге асты. Басты мақсат — көше-жол желісінің өткізу қабілетін жақсартып, көлік жүктемесін азайту және жолдағы даулы жағдайлардың алдын алу. Мамандар көлік жағдайын талдап, тұрғындардың өтінішін ескере отырып осындай шешім қабылдады. Жаңа схема көлік қозғалысын реттеп, жол қауіпсіздігін қамтамасыз етеді», — деді шенділер.
Әкімдік бұл пилоттық жоба екенін, тек сынақ аяқталған соң көшелерді біржақты күйде қалдыру немесе бұрынғы қалпына келтіру туралы шешім шығатынын хабарлады.
Алматы тұрғындары әлеуметтік желіде жол схемасы ескертусіз өзгереді және көбі тым түсініксіз деп шағымданып жатыр. Мысалы, Тілендиевтен Қарасай батырға бұрылған жерде бір бағытты қозғалыс туралы ешқандай ескерту жоқ. Екі кварталдан кейін ғана «кіруге тыйым салынады» (кирпич) белгісін байқауға болады… Жүргізушілер әдеттегідей екі бағытта жүріп жатыр, ал жолда оларды полиция күтіп тұрады екен.
«Біздің ауданда квест басталып кетті. Бірнеше көшені біржақты қозғалысқа ауыстырды, қазірдің өзінде жол полициясының он шақты машинасы тұр, олар топ-тобымен айыппұл салып жатыр (Розыбакиевтен Тілендиевке және Қарасай батырдан Абайға дейінгі аралық). Ең қызығы, 2ГИС картасы да әлі жаңармаған. Адамдар жол схемасы өзгергенін білмейді, ал оларға бірден айыппұл салып жатыр. Алғашқы бір-екі күнде ескертумен шектелсе болмай ма?» — деп жазды автомобилистер.
Абай болыңыздар!
Бұған дейін осы Алмалы ауданында, тағы да «тұрғындардың өтініші бойынша» Прокофьев, Кіші Абай және Түркебаев көшелерінің кей бөлігінде қозғалыс схемасы өзгерген.
Комментариев: 0