Алатау көшесінің Сәбденовтен Райымбекке дейінгі 2 шақырымы қолданысқа берілді. Болашақта Абай даңғылы ұзартылған соң Қарасай ауданы мен «Алтын Орда» маңында бой көтерген жаңа шағынаудан тұрғындары мегаполис орталығына жылдам жете алады.
Instagram парақшасында қала әкімі Бақытжан Сағынтаев қазір «Жаңа Алматы» дамыту жоспары аясында қалада Алатау, Түрксіб және Наурызбай аудандарына қарасты сегіз шағынаудандағы 415 көшеде 108 км жол құрылысы жүріп жатқанын жазды. Одан бөлек, биыл Думан шағынауданындағы 59 көшеде 30.5 км жолды күрделі жөндеу жұмыстары аяқталады.
206 шақырымға созылған 212 жолда орташа жөндеу жүргізіліп жатыр, олардың 20-сы ұзындығы 43 км болатын магистральді жолдар. Бұл тізімде Рысқұлов, Сүйінбай, Сейфуллин, Райымбек даңғылдары мен Сәтбаев, Күдерин, Жансүгіров, Яссауи, Шаляпин, Момышұлы, Жандосов, Құрманғазы көшелері бар.
Әкімнің сөзінше, 237 км жолға орташа немесе күрделі жөндеу жасалады, 71 шақырым жолды мамандар инженерлік коммуникация тартылған соң қалпына келтіреді, тағы 70 км жаңа жол салынады.
Сағынтаев Vision Zero концепциясы бойынша Мөңке би, Момышұлы (Шаляпиннен Райымбекке дейін), Шәріпов (Гогольден Бөгенбайға дейін) және Күдеринде (Рысқұловтан Райымбекке дейін) жасанды жол бұдырлары мен қауіпсіздік аралдары жасалатынын атап өтті.
Комментариев: 0