Алматыдағы экопостар жабылмайды

Биыл қаңтардың аяғында мәжілісмен Сергей Пономарев оңтүстік астанадағы экопостарды жабуды ұсынған.

«Қалаға 700 мыңға дейін машина кіреді, бірақ әр пост күніне небәрі төрт жүргізушіні тоқтады. Демек олар не мүлде жұмыс істемейді, не өз қалтасы үшін жұмыс істейді. Экопостар өз міндетін атқара алмайды, керісінше жүргізушілердің наразылығын туғызады», — деді депутат Олжас Бектеновке жолдаған сауалында.

Үкімет басшысы бұған жауап ретінде былтыр Алматыдағы экологиялық постар ауаны ластайтын 31 682 автомобильді анықтап, жүргізушілерге 581 794 600 теңге айыппұл салғанын, оның 443 502 023-і ел қазынасына түскенін айтты. Экологтар айыппұл салған немесе ескерту жасаған әрбір екінші немесе үшінші машинаны бір жыл ішінде қайта тоқтатқанда зиян газ мөлшері азайған. Яғни, иесі автомобильді жөндеткен.

Премьер-министр экопостардың әсерінен мегаполисте зиян газ шығаратын машиналар азайып келе жатқанын атап өтті. 2020 жылы 20 % «лас» көлік анықталса, бұл көрсеткіш 2022 жылы — 19.7 %, 2024 жылы 17 % болды.

Үкімет басшысы құрылғыларды пайдаланып көлік құралын тексеру туралы да айтты.

«Қазір мемлекеттік органдар көлік құралынан шығатын зиян газ бен түтін деңгейін бақылау мақсатында EDAR OPUS типті автоматты сезгектерді республика аумағында пайдалануға рұқсат етілген құрылғылар тізіміне қосуға күш салып жатыр. Осыларды ескере отырып, дәл қазір экологиялық постардың қызметін тоқтатуға әлі ерте деп есептейміз», — деді Бектенов.

Экопост жұмысына қандай баға бересіз? Зиян газ мөлшері нормадан асқаны үшін айыппұлтөлеп пе едіңіз?