ДТП на блокпосту в Алматы было умышленным?

Алматыдағы блокбекетте болған жол апаты қасақана жасалған ба?

Істің ҚР ҚК-нің 99-бабы бойынша қаралып жатқаны осындай күдік тудырды.

Адвокат Жангелді Сүлейманов 25 мамырда болған шулы жол апатына кінәлі азамат полицей көлігін абайсызда соқпаған деген болжам жасады.

Естеріңізге сала кетейік, жол апаты дүйсенбі күні таңғы бес жарым шамасында болды. Жетінші сериялы BMW көлігін тізгіндеген мас жүргізуші Қожабеков көшесімен жоғары жылдамдықта келе жатып, Жаңа Ғасыр көшесімен қиылысар тұсқа жете бергенде № 4 блокбекетке соғылады. Машина алдымен бетон қоршауға соғылып, артынша Hyundai Elantra-ны қаққан. Қызметтік көлікте отырған екі полицейдің бірі оқиға орнында, екіншісі ауруханада жан тапсырды. Зардап шеккендер қатарында тағы бір тәртіп сақшысы бар. Ол ауруханада ауыр жағдайда жатыр.

Кейін BMW рөлінде де полицей отырғаны белгілі болды. Мұны қалалық полиция департаменті бірден мойындаған жоқ. Тек бір күн өткен соң ғана қоғамның қысымымен Азат Азаматовтың алты жыл органдарда қызмет етіп, міндетін дұрыс атқармағаны үшін жұмыстан қуылғанын хабарлады. Бірақ қаза тапқан полицейдің жұбайы Азаматовтың жұмыстан шығарылмағанын мәлімдеді.

Бастапқыда полиция жүргізушіге қатысты ҚР ӘҚБК-нің 345-1-бабы бойынша сотқа дейінгі тергеу жұмыстары басталғанын хабарлады, алайда сәл кейінірек істің ҚР ҚК-нің 99-бабына ауысқаны белгілі болды. Адвокаттың айтуынша, бұл жол апатының әдейі жасалуы мүмкін дегенді білдіреді.

— 99-баппен қасақана жасалған қылмыс қарастырылады. Мен тергеушілердің қолында бұл адамның әдейі кісі өлтіргенін не бұған немқұрайлы қарағанын айғақтайтын дәлел бар деп ойлаймын. Яғни, ол автокөлікті қағатынын, оның ішінде адам барын және соққының өлімге әкеп соғатынын түсінген не олардың расымен өлгенін қалаған, — деп мәлімдеді Жангелді Сүлейманов.

КазТАГ дерегі бойынша, бұл Азат Азаматов қатысқан алғашқы жол-көлік оқиғасы емес. 2017 жылы ол қызметтік Peugeot рөлінде отырып, Гоголь және Абдуллиндер қиылысында «тойотамен» соқтығысқан. Алматыдағы мамандандырылған ауданаралық соттың қаулысында Азаматовтың ҚР ЖҚЕ-нің 10-бөлімі, 1-тармағын бұзғаны, сол үшін оған Қылмыстық кодекстің 610-бабы, 1-бөлігіне (Көлiк құралдары жүргiзушiлерінiң жол жүрісі қағидаларын адамдардың денсаулығына зиян келтiруге, көлiк құралдарының немесе өзге де мүлiктiң бүлінуіне алып келген бұзушылығы) сай айыппұл салынғаны жазылған.

Азаматовтың қатысуынсыз өткен сот отырысында ол кінәсіз деп танылып, бар жауапкершілік «тойота» жүргізушісінің мойнына ілінген.

Құжатта жол-көлік оқиғасына қатысты істі қарау кезінде және әкімшілік құқық бұзушылыққа ықпал еткен себептер мен шарттарды белгілеу барысында дәлелдерге дұрыс баға берілмеген, сәйкесінше, жеке тұлғаның кінәсі анықталмады деп жазылған.

Іс жүргізу тоқтатылып, Азаматовқа жүргізуші куәлігі қайтарылған.

Комментариев: 0

Чтобы оставить комментарий, вам необходимо зарегистрироваться или авторизоваться.