Алматыда Camry-дің төрт жолаушысы полицейлерге күш көрсетті

19 желтоқсанда әлеуметтік желіде Алматыда болған оқиғаның видеосы тарады. Бірнеше жігіт полициямен сөзге келіп қалған, сол сәтте бір полицей жас жігітті итеріп жібереді. Ал ол сырт киімін шешіп, қызметкерге тап берген.

Ескерту: Видеода балағат сөздер бар!

Алматы полиция департаменті Kolesa.kz редакциясына хабарлағандай, камераға төрт мас ер адамның полиция талабына бағынбаған сәті жазылған.

Олар заңсыз әрекеті арқылы Toyota Camry жүргізушісінің қашып кетуіне мүмкіндік жасаған, оқиға орнынан із жасырған жүргізуші мас болуы мүмкін. Оқиғаға қатысқан адамдардың әрекетіне құқықтық баға беріледі. Полиция қызметкерлері де қызметтік тексерістен өтеді.

Полицияға күш көрсеткендер қандай жазаға тартылады?

Қылмыстық кодекстің 378-бабына сай, билік өкiлiн қызметтiк мiндетiн атқару кезiнде жәбірлеген адамға 180 АЕК айыппұл салынады не сол мөлшерде түзеу жұмысына не 180 сағат қоғамдық жұмысқа тарту немесе 20 тәулікке қамау жазасы беріледі.

Ал Қылмыстық кодекстің 380-бабына сай, билік өкілі қызметтік міндетін атқару барысында оны денсаулығына зиян келтіремін деп қорқытса, 2000 АЕК айыппұл салынады не сол мөлшерде түзеу жұмысына не 600 сағат қоғамдық жұмысқа тарту немесе екі жылға дейін бас бостандығын шектеу не сол мерзімге бас бостандығынан айыру жазасы кесіледі.

Сондай-ақ полиция қызметкерінің өміріне немесе денсаулығына қауіпті емес күш қолдану әрекеті үшін кінәлі азамат 4000 АЕК айыппұл арқалайды немесе сол мөлшерде түзеу жұмысына не 1000 сағатқа дейін қоғамдық жұмысқа тартылады немесе 2 жылдан 4 жылға дейін бас бостандығы шектеледі немесе сол мерзімге бас бостандығынан айырылады.