Алматыда 22 басты көше жөнделеді

Биыл мегаполис әкімдігі 300 км жолды жөндейді. 367 көше орташа жөндеуден өтеді. Жаздың аяқталғанша 22 басты жол жаңарады. Мердігерлер 31 қазанға дейін барлық жұмысты аяқтауға міндетті.

Мына жолдар орташа жөндеуден өтеді:

• Ұлықбек көшесі Момышұлынан Саинға дейін;
• Тілендиев көшесі Төле биден Райымбекке дейін;
• Бекмаханов көшесі Майлиннен Спасскаяға дейін;
• Достық даңғылы Әл-Фарабиден Қазыбек биге дейін;
• Назарбаев даңғылы Қажымұқаннан оңтүстіктегі тұйыққа дейін;
• Қажымұқан көшесі Назарбаевтан 8-гвардиялық дивизияға дейін;
• Дулати көшесі Набережнаядан ҮАК жолындағы экопостқа дейін;
• Жароков көшесі Исиналиевтен Өтеповке дейін;
• Бұқтырма көшесі Майлиннен Талғар трассасына дейін;
• Жұбанов көшесі Садовниковтан Момышұлына дейін;
• Қабанбай батыр көшесі Қастеевтен Қалдаяқовқа дейін;
• Майлин көшесі әуежайдан ВАЗ жолайырығына дейін;
• Мөңке би көшесі Оңғарсыновадан Мәмбетовке дейін;
• Серкебаев көшесі Әл-Фарабиден Тимирязевке дейін.

Орташа жөндеу жұмысы барысында мамандар жол жабынын толық жаңартып, тозған тротуар мен суару арнасын ауыстырады. Жұмысшылар алған материалды қайта пайдалану үшін аудан әкімдіктеріне береді.

Алғабас, Ақжар, Шұғыла, Шаңырақ-1, Жас-Қанат, Боралдай және Рахат-Мәдениет шағынаудандарында жаңа жол құрылысы жалғасады.

Жол жөндеушілер көшелерді жартылай жауып, жұмысты кезең-кезеңімен жүргізеді. Бірақ қалада кептеліс болатыны анық. Қай күні қай көше жабылатынын әкімдік алдын ала хабарлайды. Объектілердің маңында айналма жол сызбасы бар тақтайша, қоршау және жарық шағылысатын элементтер болады.

Мамандар жолға полимерлі асфальтбетон төсейді. Әкімдік мұндай жабын ыстыққа төзімді екенін әрі 10 жылға жарайтынын айтқан. Бірақ былтыр Абай даңғылына төселген асфальт екі ай өтпей шөгіп кетті. Тимирязев сияқты бірнеше көшеде де полимерлі асфальттан ақау табылды. Жол бөліктері қайта жөнделді, бірақ жабынның мықты екеніне сенім аз.