Алматы қаласының Қаржылық мониторинг агенттігі хабарлағандай, қылмыстық топ үш жыл бойы көлікті бастапқы тіркеу ақысын төлемей, жалған тіркеумен айналысқан. Оларға арнайы ХҚКО қызметкерлері көмектесіпті. Алаяқтар делдал арқылы көлігін «арзанға» тіркегісі келетіндерді іздеген.
«Қылмыскерлер заңсыз әрекетін жасыру үшін басқа адамдарды пайдаланған, олардың атына құжат рәсімдеген. Кейін арнайы ХҚКО қызметкерлері ақпараттық жүйеге жалған дерек енгізіп, көліктерді заңсыз тіркеген», — деп хабарлады департамент.
Үш жыл ішінде 132 машинаны заңсыз есепке қойып, мемлекетке 1.2 млрд теңгеден астам шығын келтірген қылмыскерлер тергеу барысында 273 млн теңгені өз еркімен қайтарды.
Алаяқтық схеманы ұйымдастырған үш азамат ұсталып, 3 жылдан 4 жыл 6 айға дейін бас бостандығынан айырылды. Сотталғандардың жеті автомобилі тәркіленді. Үкім заңды күшіне енді.
Комментариев: 0