Ірі жол апаты кеше 19:40 шамасында болды. Алматы облысы ПД баспасөз қызметі хабарлағандай, ірі қара мал тиеп, оңтүстік бағытта қозғалып бара жатқан Foton ВG рөліндегі 25 жастағы азамат қалың тұман салдарынан алдында келе жатқан МAN 26-272-ні көрмей қалған. Апат салдарынан Foton-да отырған жүргізуші мен жолаушы және көліктегі жануарлардың бірі зардап шекті.
Сәл уақыт өткен соң әлгі Foton-ға Volkswagen Passat соғылады. Соққыдан жеңіл машина жүргізушісі мен ондағы жолаушы жарақат алды. Тағы біраз уақыт өткенде «Пассатты» Foton AUMAN кеп қаққан.
Кейін дәл сол маңнан апат орнын айналып өтіп бара жатқан екі «тойота» мен Mitsubishi Delica түйісті. Оған қоса Toyota Hilux жол ортасында тұрған екі ер адамды қағып өткен.
«QazAvtoJol» ҰК" баспасөз қызметі жол апаты болған ақылы жол бөлігінде көктайғақ болмағанын, көліктердің қардан тазартылған жолақпен қозғалғанын мәлімдеді. Жолдың жақсы көрінуіне полигон жақтан шыққан түтін кедергі келтірген. Апаттың мән-жайы анықталып жатыр.
Қапшағай тас жолына жақын жерде орналасқан қоқыс полигоны жиі отқа оранатынын айта кеткен жөн. Өткен жылы шілде айында соның салдарынан тағы бір ірі жол апаты болған. Ол кезде сегіз көлік бүлініп, үш адам жарақат алды.
Комментариев: 0