Александр Артемьев Дубайдағы жарыста екінші орын алды

Өткен демалыста Дубайда тәуліктік Michelin 24H Dubai марафоны өтті. Жарысқа алты негізгі класс бойынша 60-тан аса экипаж қатысқан, арасында қазақстандық Александр Артемьевтің Seblajoux Racing командасы да болды.

Франциялық ұжым Porsche 911 GT3 Cup болидіне арналған 992 категориясында екі экипажбен бақ сынады. Тректе өткен 24 сағатта спортшылар шамамен 580 айналым жасады, нәтижесінде команданың екі машинасы да подиумға көтерілді.

992 класының жалпы есебінде Seblajoux Racing командасының 910 және 888 нөмірлі экипаждары тиісінше үшінші және төртінші орын алды. Бірақ бұл класс іштей кәсіпқой және әуесқой құрамдарға бөлінеді. 888 нөмірлі Porsche-ні тізгіндеген Александр Артемьев пен оның төрт серіктесінің үшеуі әуесқой санатына жатады. Олар 992-AM қосалқы класында екінші орын алды.

Артемьев 911 класының көшбасшыларынан алты айналымға, ал 992-AM категориясындағы жеңімпаздардан бес айналымға қалып қойды. Бірақ бұл күміс жүлде отандасымыздың Дубай марафонындағы ең үздік нәтижесі саналады.

Жалпы Michelin 24H Dubai жарысында Team WRT командасының 669-нөмірлі экипажы жеңіске жетті. Олар BMW M4 GT3 EVO-мен жолға шыққан. Осы ұжымның тағы бір экипажы (№ 27) екінші орын алса, үшінші жүлде Winward Racing командасының Mercedes-AMG GT3 EVO (№ 16) көлігіне бұйырды.