Әл-Фарабидегі апатқа кінәлі азаматқа сот үкім шығарды

Ауыр апат 21 наурызға қараған түні 03:30-да Алматыдағы Әл-Фараби даңғылы мен Меңдіқұлов көшесінің қиылысында болған. Mercedes-Benz C-Class седаны мен Zeekr 9X кроссовері бетпе-бет соғылып, «мерседестегі» 20 және 22 жастағы екі қыз бен көлікті тізгіндеген 29 жастағы ер адам оқиға орнында көз жұмды.

Апатқа кәсіпкер Александр Пак себеп болған. Ол мас күйінде жалған нөмір таққан машинамен 219 км/сағ жылдамдықпен келе жатып, көлікті басқара алмай, жолдың қарсы бетіне өтіп кеткен.

Сот отырысында марқұмдардың туыстары Пакты кешірдік деп, бас бостандығынан айырмауды сұрады. Өмірден өткен тағы бір қыздың әкесі қатаң жаза беруді талап етті. Ол кәсіпкерден 100 млн теңге көлемінде материалдық шығынды өтеуді сұрады.

Айыпталушы кінәсін ішінара мойындап, оқиғаға «зикрдің» қауіпсіздік жүйелері мен тежеуіш жүйесіндегі ақау себеп болды деп ақталды. Оның айтуынша Әл-Фараби даңғылымен келе жатқанда аспаптар панелінде ескерту белгілері жанып, көлік гуілдей бастаған, содан кейін автомобиль кенет қарсы жолаққа шығып кетіпті. Ол мұны жолаққа қайтару жүйесінің жұмысы болуы мүмкін деп түсіндірді. Тежеуіштер де істен шықты деді.

Қорғаушы істі Қылмыстық кодекстің 345-бабы (жол ережесін бұзып, абайсызда екі немесе одан да көп адамның өліміне себеп болу) бойынша қайта қарауды және ең жеңіл жаза қолдануды сұрады. Прокурор айыпталушының мас күйде көлік жүргізгенін ескеріп, оны Қылмыстық кодекстің 345-1-бабы бойынша ұзақ мерзімге соттауды талап етті.

Сот Александр Пакты Қылмыстық кодекстің 345-1-бабының 4-бөлігі (алкогольге масаң күйде жол ережесін бұзып, абайсызда екі немесе одан көп адамның өліміне себеп болу) бойынша кінәлі деп танып, 10 жылға бас бостандығынан және өмір бойына көлік жүргізу құқығынан айырды. Ол қауіпсіздігі төмен мекемеде жазасын өтейді. Қаза тапқан қыздың әкесінің талап-арызын сот ішінара қанағаттандырды. Жол апатына кінәлі тұлға моральдық шығын ретінде 10 миллион теңге төлеуге міндеттелді.

Үкім шыққан соң судья Еркін Майшинов айыпталушының жоғары жылдамдықпен қарсы жолаққа шыққаны анық дәлелденгенін және мұны куәгерлердің айғақтары, сараптама қорытындысы және тергеу материалдары растағанын айтты.

«Сот дәлелдердің шынайылығына күмәнданатындай негіз таппады. Жаза тағайындау кезінде жүргізуші жол ережесін өрескел бұзғаны және үш адамның қаза тапқаны ескерілген. Бұл — марқұмдардың жақындары үшін ауыр қайғы. Ұзақ мерзімді жаза әділдік орнату және мұндай оқиғалардың қайталануына жол бермеу мақсатында тағайындалды», — деді судья.